Uga Ka Kalij Maze Ule Lyrics | उगा कां काळीज माझे उले

 ।। उगा कां काळीज माझे उले ।। 

उगा कां काळीज माझे उले ?

पाहुनी वेलीवरची फुले 

कधी नव्हे ते मळले अंतर 

कधी न शिवला सवतीमत्सर 

आज का  लतिकावैभव सले ?

काय मना हे भलते धाडस ?

तुला नावडे हरिणी पाडस 

पापणी वृथा भिजे का अले ?

गोवत्सांतील पाहून भावा 

काय वाटतो तुजसी हेवा ?

चिडे का मौन तरी आंतले ?

कुणी पक्षिणी पिला भरविते 

दृश्य तुला ते व्याकुळ करिते 

काय हे विपरीत रे जाहले 

सतःस्वतःशी कशास चोरी ?

वात्सल्य विन अपूर्ण नारी 

कळले सार्थक जन्मातले 

मूर्त जन्मते पाषाणातून 

कौशल्या का हीन शिळेतून ?

विचारे मस्तक या व्यापिले 

गगन अम्हांहूनि वृद्ध नाही का ?

त्यात जन्मती किती तारका !

अकारण जीवन हे वाटले 

 । गीतकार : ग. दि. माडगूळकर ।  

  । संगीतकार : सुधीर फडके ।   

  । गायक : सुधीर फडके ।